नानकुन मोर गाँव हे
मौहडीह जेकर नाव हे
जिहा महतारी कस मया करोइया महानदी हे
अउ ददा कस दुलार करोइया हसदेवा हे
ऐसे पावन भुइँया म बिराजे मोर गांव हे
मौहडीह जेकर नाव हे
नानकुन मोर गाँव हे
मौहडीह जेकर नाव हे
सुमिरव गांव के नागू,ठाकुर अउ छापर बाबा
संगम म बिराजे हे हमर सिद्ध बाबा
हमर गांव के इही हरे काशी अउ काबा
जय हो जय हो गाँव के भोले बाबा
नानकुन मोर गाँव हे
मौहडीह जेकर नाव हे
भंडार म सिलादेही के सतबहिनिया दाई
रक्सेल म सोनियाडीह गांव हे
उत्ती म किकिरदा के विशेसरी माई
अउ बुडती म केरा के चंडी दाई हे
सब के कोरा म बिराजे ऐसे मोर गांव हे मौहडीह जेकर नाव हे 2
नानकुन मोर गाँव हे
मौहडीह जेकर नाव हे
मौहडीह मरार मन के गांव ए
साग भाजी कमाना ओकर काम ए
इहा के ग्वांर सुनसुनिया, अउ कांदा भाजी लाजवाब हे
संग म बिही अउ खेड़ा म घलो, बड़ मिठास हे
ऐसे मोर गांव हे,मौहडीह जेकर नाव हे 2
नानकुन मोर गाँव हे
मौहडीह जेकर नाव हे
अंग्रेज मन के गिरजा बंगला अउ बाबा तरिया इहा के चिन्हारी ए
नदिया के तीरे तीर हिरवा के ओन्हारी हे
लीम पीपर के रुख, घरो घर खोल बारी हे
ऐसे मोर गांव के चिन्हारी हे
नानकुन मोर गाँव हे
मौहडीह जेकर नाव हे
नवधा भागवत हो या नवरात
सबो मिल के करथन जी शुरुवात
चार घर के रउत एक घर बाम्हन
सबो मिल जुल के तिहार ल मनाथन
भोला भाला हे किसान इहाँ के
अपन रद्दा जाथे अपन रद्दा आथे
नई करय भेद भाव ककरो से
मिल जुर के खेत खार म कमाथे
नानकुन मोर गाँव हे
मौहडीह जेकर नाव हे
कैसे करव मैं बखान,सब हे इहाँ महान
सियान के हे मान, त नारी के सम्मान
सबो गावत है मौहडीह के गुणगान
इहा परकृति घलो महेरबान हे
दु फसली लगथे ईहाँ धान हे
कोदो कुटकी पीपर के खवइया
अब बेचत बोरा-बोरा धान हे
नानकुन मोर गाँव हे
मौहडीह जेकर नाव हे
इहा के सड़क नई बनिस त का होगे
धुर्रा चिखला माटी हमर पहिचान होगे
कभू आहा हमर गांव भुलाहा झन दिनु हे मोर नाव
ऐसे है मोर गांव मौहडीह जेकर नाव
नानकुन मोर गाँव हे
मौहडीह जेकर नाव हे
No comments:
Post a Comment